غدیر اس لکیر کا نام ہے جو منافق اور مومن کی راہوں کو جدا جدا کرتی ہے، علامہ ناصر عباس جعفری

شیعہ نیوز:مجلسِ وحدت مسلمین پاکستان کے چیئرمین علامہ راجہ ناصر عباس جعفری نے ولایت امیر المومنین حضرت علی علیہ السلام کے پیروکاروں کو عید غدیر کے بابرکت موقع پر مبارکباد پیش کی ہے۔ انہوں نے کہا کہ یوم غدیر روز تکمیل دین ہے، نبی کریم صلی اللہ علیہ وآلہ وسلم کی زبان مبارک سے مولائے کائنات کی ولایت کا اعلان وہ حکم خداوندی تھا جسے غدیر خم میں کم وبیش ڈیرھ لاکھ افراد نے سنا، ذکر علیؑ حق و باطل کی شناخت کے لئے سب سے مؤثر ہتھیار ہے، ولایت علیؑ ابن ابیطالبؑ معیار ایمان ہے، جس شخص کے دل میں فاتح خبیر مولائے کائنات حضرت علی علیہ السلام کا عشق موجود نہیں اس کی نماز روزہ اور دیگر عبادات کو سوائے جسمانی مشقت کے کوئی دوسرا نام نہیں دیا جا سکتا۔

ان کا مزید کہنا تھا کہ رسول کریم (ص) نے مولائے کائنات حضرت علی علیہ السلام کے چہرے کی طرف دیکھنے کو عبادت اور ان کی محبت کو واجب قرار دیا ہے۔ انہوں نے کہا کہ یوم غدیر اس لکیر کا نام ہے جو منافق اور مومن کی راہوں کو جدا جدا کرتی ہے، تمام پیروان ولایت علیؑ ابن ابی طالبؑ پر یہ ذمہ داری عائد ہوتی ہے کہ یوم غدیر کے دن اللہ تعالی کے احکامات کی بجا آوری کرکے اس کی اس عظیم نعمت کا شکر ادا کریں، خوشی کے اس موقع پر اپنے ضرورت مند عزیز اقرباء کو خوشی کے موقعوں پر فراموش نہ کیا جائے۔