انقلابِ اسلامی فقط ایران کیلئے نہیں بلکہ تمام اسلامی ممالک کیلئے مشعل راہ ہے

شیعہ نیوز (پاکستانی شیعہ خبر رساں ادارہ) اصغریہ اسٹوڈنٹس آرگنائزیشن پاکستان کے مرکزی صدر ثقلین علی جعفری کا کہنا ہے کہ انقلابِ اسلامی فقط ایران کیلئے نہیں بلکہ تمام اسلامی ممالک کیلئے مشعل راہ ہے۔

تفصیلات کے مطابق انقلاب اسلامی ایران کی 43ویں سالگرہ کے موقع پر اپنے پیغام میں ثقلین علی جعفری نے کہا کہ انقلاب اسلامی ایران نے تمام دنیا کے مسلم ممالک کو عظیم عزت سے نوازا ہے، اس انقلاب کی بدولت مسلم امہ میں کامیابی کی لہر جاری ہے، یہ انقلاب اسلامی اس صدی کے جلیل القدر فرزند رہبر کبیر امام خمینیؒ کی عظیم جدوجہد کا ثمر ہے۔

یہ خبر بھی پڑھیں انقلاب اسلامی ایران حقیقی اسلام کی سربلندی اور فتح کا دن ہے

انہوں نے کہا کہ انقلاب اسلامی ایران نے دنیا بھر میں بسنے والے تمام عالم اسلام میں اتحاد بین المسلمین کو رائج کرکے تمام فرعونِ جہان کے منہ پر زوردار طمانچہ لگایا ہے۔ انہوں نے کہا کہ انقلابِ اسلامی کی اس باضمیر تحریک نے مسلم ممالک کے حکمرانوں کو حقیقی سیاست جیسے اہم پہلو سے روشناس کیا ہے۔

ثقلین علی جعفری نے کہا کہ اس انقلاب کی بدولت اس جہاں کے مسلمین میں غیرت، شجاعت اور امامت جیسی عظیم صفات نے جنم لیا ہے۔ انہوں نے کہا کہ اس وقت انقلاب اسلامی کی قیادت آیت اللہ العظمیٰ سید علی خامنہ ای (حفظہ اللہ) کر رہے ہیں، نوجوانانِ امت کو انقلاب اسلامی کے اس عظیم قائد کی تعلیمات کا مطالعہ اور اس پر عمل کرنے کی اشد ضرورت ہے۔

انہوں نے انقلاب اسلامی کی 43ویں سالگرہ کے موقع پر رہبر انقلاب اسلامی آیت اللہ العظمیٰ سید علی خامنہ ای (حفظہ اللہ) اور تمام مسلم امہ کی خدمت میں مبارک باد بھی پیش کی۔