عراق میں امریکی سفارت خانے اور کانوائے پر حملہ
شیعہ نیوز : عراق کے خبری ذرائع کا کہنا ہے کہ عراق کے دارالحکومت بغداد کے گرین زون میں امریکی سفارت خانے پر راکٹ داغے گئے ہیں۔
فارس خبر رساں ایجنسی کی رپورٹ کے مطابق عراق کی مقاومتی فورسز نے آج بدھ کے روز کہا کہ بغداد کے گرین زون میں امریکی سفارت خانے کے فوجی حصے پر راکٹ داغے گئے۔ امریکی فوجیوں نے راکٹ حملوں کے بعد سفارتخانے کے دروازے بند کر دیئے۔
راکٹ حملے کے بعد خطرے کے سائرن بجنے لگے۔ ابھی تک اس حملے میں جانی نقصان کے حوالے سے کوئی رپورٹ سامنے نہیں آئی ہے۔ چند روز قبل بھی التاجی اور البلد کے امریکی فوجی اڈوں کے قریب راکٹوں سے حملہ ہوا تھا۔
دوسری جانب عراق کے صوبہ بابل میں منگل کی شب امریکی دہشت گردوں کے راستے میں سڑک کے کنارے نصب بم اس وقت زور دار دھماکے سے پھٹ گیا جب ان کا کارروان وہاں سے گزر رہا تھا۔
ارنا کی رپورٹ کے مطابق خبری ذرائع کا کہنا ہے کہ امریکہ کے فوجی کانوائے کے راستے میں دھماکہ بابل ہائی وے پر ہوا۔
اس سے قبل عراق کے دارالحکومت بغداد کے گرین زون میں امریکی سفارت خانے کے فوجی مرکز پر پیر کی شب کئی راکٹ داغے گئے تھے جبکہ اس حملے سے چند گھنٹے قبل صوبہ قادسیہ اور بابل میں ہی امریکہ کے دو فوجی کانوائے کے راستوں میں دھماکے بھی ہوئے تھے۔
ابھی تک ان حملوں میں جانی نقصان کے حوالے سے کوئی رپورٹ سامنے نہیں آئی ہے۔
عراقی عوام اور سیاسی اور مذہبی جماعتیں ملک سے امریکی فوجیوں کے انخلا کا مطالبہ کر رہی ہیں جبکہ عراق کی پارلیمنٹ نے بھی اس ملک سے امریکہ کے دہشت گرد فوجیوں کے انخلا کا بل اکثریتی رائے سے منظور کیا ہے۔
