سعودی ولیعہد نے پاکستانیوں کو ماموں بنا دیا،ایک بھی قیدی رہا نہ ہوسکا

شیعہ نیوز (پاکستانی شیعہ خبر رساں ادارہ) سعودی ولیعہد محمد بن سلمان نے پاکستانیوں سے کیا گیا وعدہ وفا نہ کیا، سعودی جیلوں میں قید ایک بھی پاکستانی وطن واپس نہ پہنچ سکا۔

تفصیلات کے مطابق پاکستانی دفتر خارجہ کے حکام نے بتایا ہےکہ سعودی عرب نے پاکستانی قیدیوں کی رہائی کیلئے تاحال کوئی اقدام نہیں کیا۔

اسلام آباد میں سینیٹ کی قائمہ کمیٹی برائے انسانی حقوق کا چیئرمین مصطفیٰ نواز کھوکھر کی زیر صدارت اجلاس ہوا، جس میں سعودی جیل میں قید ملتان کے رہائشی مرید عباس کے معاملے پر غور کیا گیا۔

دفتر خارجہ کے حکام نے کمیٹی کو مرید عباس سمیت سعودی جیلوں میں قید پاکستانیوں سے متعلق بریفنگ دیتے ہوئے بتایا ملتان کا رہائشی مرید عباس بحیثیت ڈرائیور سعودی عرب گیا تھا، اس پر وہاں 27 ہزار ریال جرمانہ عائد ہے، ہم کوشش کر رہے ہیں کہ ان کے کفیل سے رابطہ کرکے مرید عباس کو رہا کرائیں۔

حکام نے بتایا سعودی عرب میں 3 ہزار سے زائد پاکستانی قید ہیں، جدہ میں 128 پاکستانی شہری ہیں، دارالحکومت ریاض میں 114 پاکستان ایسے ہیں، جن کے جرمانے ادا کرنے ہیں، ایک اندازے کے مطابق سعودی عرب میں قید پاکستانیوں کی رہائی کیلئے 8 تا 22 ملین ریال رقم درکار ہے۔

چیئرمین کمیٹی نے استفسار کیا سعودی ولی عہد محمد بن سلمان کی جانب سے پاکستانی قیدیوں کی رہائی سے متعلق اعلان میں کیا پیشرفت ہوئی۔؟ ایڈیشنل سیکرٹری خارجہ محمد ندیم خان نے انکشاف کیا کہ تاحال کوئی اقدام نہیں اٹھایا گیا۔

کمیٹی ارکان نے کہا محمد بن سلمان کے قیدیوں کی رہائی سے متعلق اعلان سے سب بہت خوش ہوئے تھے، لیکن اس پر عملدرآمد نہیں ہوا، یاد دہانی کے باوجود تاحال قیدیوں کی فہرست تک جاری نہیں کی گئی۔

واضح رہے کہ سعودی ولیعہد محمد بن سلمان نے پاکستان کے دورے پر اعلان کیا تھا کہ سعودی عرب میں قید تمام پاکستانیوں کو رہا کردیا جائے گالیکن کسی کہنے والےنے کیا خوب کہا ہے کہ ’’وہ وعدہ ہی کیا جو وفا ہوگیا‘‘۔