تحریک فلسطین، قاسم سلیمانی اور عماد مغنیہ کی احسان مند ہے۔ حماس
شیعہ نیوز (پاکستانی شیعہ خبر رساں ادارہ) فلسطین کی اسلامی مزاحمتی تحریک حماس کے رہنما عبد و ہادی نے کہا ہے کہ فلسطین کی آزادی کی تحریک میں عالم اسلام کے عظیم مجاہدین بشمول لبنانی حزب اللہ کے کمانڈر شہید عماد مغنیہ اور عالم اسلام کے عظیم مجاہد شہید قاسم سلیمانی کی خدمات کو کبھی فراموش نہیں کیا جا سکتا۔
ان خیالات کا اظہار انہوں نے گذشتہ دنوں بیروت میں پر ہجوم پریس کانفرنس سے خطاب کرتے ہوئے کیا، انہوں نے کہا کہ یہ عماد مغنیہ اور قاسم سلیمانی ہی تھے کہ جو ہمیشہ زمینی خفیہ راستوں سے فلسطین کے مقبوضہ علاقوں میں آ کر حماس کی مدد کرنے میں پیش پیش رہتے تھے۔
ان کا کہنا تھا کہ غزہ کے تین سو ساٹھ کلو میٹر علاقہ میں زیر زمین سرنگوں کو بنانے کا کام سب سے پہلے لبنان کی حزب اللہ کے کمانڈر عماد مغنیہ نے شروع کیا جس کو وسعت دینے میں دوسرے اہم کردار کا نام شہید قاسم سلیمانی ہے۔
فلسطینی جماعت حماس کے رہنما نے مزید کہا کہ عماد مغنیہ ہوں یا قاسم سلیمانی یہ دنوں ہی مستقل طور پر غزہ کی پٹی میں اپنی فلسطینی مجاہد بھائیوں کی ہمراہ ہوتے تھے اور ہمیشہ صیہونی دشمن کو شکست دینے میں دونوں مجاہدین اسلام کا کردار بے مثال رہا ہے، انہوں نے کہا کہ تحریک آزادی فلسطین کی تاریخ میں عماد مغنیہ اور قاسم سلیمانی کو ہمیشہ یاد رکھا جائے گا۔
عبد وہادی نے فلسطین کی تحریک آزادی کی سرگرمیوں کے بارے میں گفتگو کرتے ہوئے بتایا کہ فلسطین میں اسرائیل کے خلاف جاری جدوجہد میں عماد مغنیہ اور قاسم سلیمانی کو اس لئے بھی اہمیت حاصل ہے کہ انہوں نے فلسطینیوں کو اسرائیل سے مقابلہ کے لئے کور نیٹ میزائل اور دیگر اسلحہ کی مدد فراہم کی جس کی بدولت غاصب صیہونی ریاست اسرائیل کو متعدد موقعوں پر فلسطینی مزاحمت کے ہاتھوں شکست اُٹھانا پڑی۔
انہوں نے کہا کہ قاسم سلیمانی اور عماد مغنیہ کا غزہ میں اسرائیل کو شکست سے دو چار کرنے میں اہم کردار رہا ہے جس پر پوری فلسطینی قوم اور فلسطین کی مزاحمتی تحریکیں عماد مغنیہ اور قاسم سلیمانی کو اپنا قائد اور ہیرو مانتی ہیں۔
واضح رہے کہ لبنان کی حزب اللہ کے اعلی سطح کے کمانڈر اور سنہ 2006 میں حزب اللہ اور اسرائیل کے مابین ہونے والی جنگ کے فاتح عمادمغنیہ کو 12 فروری سنہ 2008 میں عالمی دہشت گرد امریکہ اور اس کی ناجائز اولاد نے شام میں ان کی گاڑی کو میزائلوں کا نشانہ بناتے ہوئے شہید کر دیا تھا جبکہ القدس فورس کے سربراہ قاسم سلیمانی کو امریکی شیطان نے 3 جنوری سنہ 2020 میں بغداد ائیرپورٹ سے نکلتے وقت دہشت گردانہ حملے میں ابو مہدی مہندس کے ہمراہ شہید کر دیا تھا۔
