امام حسینؑ کا یوم ولادت انسانیت کیلئے مسرت کا دن ہے قائد ملت جعفریہ

شیعہ نیوز: قائد ملت جعفریہ پاکستا ن علامہ سید ساجد علی نقوی نے نواسہ پیغمبر اکرم ۖ ‘ محسن انسانیت حضرت امام حسینؑ کی ولادت باسعادت (3شعبان المعظم ) کے موقع پر کہا کہ حسین ابن علی کایوم ولادت انسانیت کیلئے مسرت کا دن ہے’ عالم انسانیت کے رہبر اور بشریت کے ہادی و امام نے انبیاء کرام کے مشن اصلاح کو اپنا مطمع نظر قرار دیا اور نظام اسی ہدف کیلئے سب کچھ قربان کردیا جو تا قیامت رہنمائی کا مینار قرار پایا ۔

علامہ سید ساجد علی نقوی نے کہا کہ فرزند رسول اکرم ۖ حضرت امام حسین نے کی جدوجہد کا اثر ہے کہ دنیائے عالم میں حریت و استقلال پر مبنی تمام تحریکوں نے تحریک کربلا سے درس حریت حاصل کیااور جب حریت پسندوں کو اپنی جدوجہد کے لئے بہترین قیادت کی ضرورت محسوس ہوئی تو انہوں نے حضرت امام حسین کی لازوال شخصیت کی طرف رجوع کیا اور ان کے کر دار سے استفادہ کرتے ہوئے اپنی جدوجہد آگے بڑھاکر کامیابی حاصل کی۔

یہ بھی پڑھیں: کرم امن معاہدے پر مکمل عملدرآمد کیا جائے گا، جرگے کا اعلان

علامہ ساجد نقوی نے مزید کہا کہ آپ نص قرآنی کے مطابق فرزند رسول ۖ ہیںاور آپ کی حیات مبارکہ رسول معظم ۖ سے اکتساب کا فیض ہے اور جو زندگی سیرت رسول ۖ کا عین عکس اور اور مجسمہ ہو اس کا ہر فعل اور اقدام احکام الہی کے تابع ہوتا ہے۔حضرت امام حسین کے ساتھ پیغمبر اکرم ۖ کی محبت اور وابستگی احادیث مبارکہ سے بھرپور انداز میں عیاں ہوتی ہے۔ رسول خدا نے امام حسین کو اپنااور خود کو امام حسین کا قرار دے کر عالم انسانیت پر واضح کردیا کہ ان دونوں ہستیوں کا باہمی تعلق انتہائی گہرا اور راسخ ہے۔ لہذا نبوت و لایت کے پاکیزہ گھرانے میں پرورش پانے والی اس پاکیزہ ہستی کی سیرت و کمالات کا مطالعہ اور ان تعلیمات پر عمل پیرا ہونا ہی ہمیں گناہ آلود معاشرے کو دینی

اقدار اور جذبہ حریت کے ذریعے اسلام کے سانچے میں ڈھالنے کے لئے رہنمائی فراہم کرتا ہے۔
انہوں نے کہا ہے کہ نواسہ رسول اکرم ۖ حضرت امام حسین علیہ السلام نے دین حق کے غلبے’ اسلامی شعائر و اقدار کے فروغ’ امر بالمعروف اور نہی عن المنکر کے لئے ایسی لہو رنگ جدوجہد کی جو تاقیامت ہر حریت مند اور صاحب عمل کے لئے رہنمائی کا مینار قرار پاتی رہے گی۔

علامہ ساجد نقوی نے امت مسلمہ پر زور دیا کہ وہ حضرت امام حسین کے الہی’ آفاقی اور مجاہدانہ کردار کو مشعل راہ بناتے ہوئے عالم اسلام کے مسائل کو حل کرے اور ظالم و جابر قوتوں کے خلاف ڈٹ جائے اور ان پر واضح کردے کہ حسینی ظلم و جبر کے سامنے سیسہ پلائی ہوئی دیوار تو بن سکتے ہیں لیکن اپنے نظریات اور اصولوں سے دستبردار نہیں ہوسکتے۔