ہانگ کانگ کے ساتھ چین جیسا سلوک کریں گے، ٹرمپ
شیعہ نیوز (پاکستانی خبر رساں ادار ہ )امریکی صدر نے ہانگ کانگ کے بارے میں چین کی پالیسی پر ایک بار پھر نکتہ چینی کرتے ہوئے کہا کہ آج کے بعد سے اس کے ساتھ بھی وہی سلوک کیا جائے گا جیسا چینی علاقوں کے ساتھ کیا جا رہا ہے۔
چین کی نیشنل پیپلز کانفرنس نے تیس جون کو ہانگ کانگ سیکورٹی بل کی منظوری دی تھی جس نے امریکہ اور اس کے اتحادیوں کے غم و غصے کی آگ کو بھڑکا دیا ہے۔
اس قانون کا اطلاق علیحدگی پسندوں اور ایسے افراد پر ہوگا جو ہانگ کانگ میں دہشت گردی پھیلانے یا اس کے اندرونی معاملات میں مداخلت کا ارادہ رکھتے ہوں۔
امریکی صدر نے بدھ کے روز ایک بار پھر چین پر کورونا وائرس کے حوالے سے حقائق چھپانے کا الزام لگاتے ہوئے کہا کہ عالمی ادارۂ صحت چین کی کٹھ پتلی بنا ہوا ہے۔ امریکہ نے عالمی ادارہ صحت پر چین کے تسلط کا الزام عائد کرتے ہوئے اس ادارے سے علیحدگی اختیار کر لی ہے۔
ڈونلڈ ٹرمپ نے کورونا وائرس کے حوالے سے اپنی حکومت کی کارکردگی کا دفاع کرتے ہوئے دعوی کیا ہے کہ بہت جلد کورونا ویکسین کی تیاری کے بارے میں اچھی خبریں سننے کو ملیں گی۔
