علامہ سید ضیاءالدین رضوی کے مشن کیلئے سب کچھ قربان کر دیا جائیگا، علامہ راحت الحسینی

امپھری میں شہید کی رہائشگاہ پر انکی ساتویں برسی کے اجتماع سے خطاب میں گلگت کے امام جمعہ و جماعت کا کہنا تھا کہ اپنی مخصوص سوچ کو پروان چڑھانے والے عناصر آج گلگت کے عوام کو دہشتگردی کی آگ میں ڈالنے کی کوشش کر رہے ہیں۔

شہید مظلوم علامہ سید ضیاءالدین رضوی کی ساتویں برسی کے مناسبت سے ایک تعزیتی اجتماع، رضاکااران حسینی امپھری اور جے ایس او امپھری یونٹ کے زیراہتمام رہائش گاہ شہید رضوی امپھری میں منعقد کیا گیا، جس میں ہزاروں کی تعداد میں مومینن نے شرکت کی اجتماع سے خطاب کرتے ہوئے آغا سید راحت حسین الحسینی نے کہا کہ شہید سید ضیاءالدین رضوی کے مشن کیلئے تن من دھن سب کچھ قربان کر دیا جائیگا۔ آج 7 سال کا عرصہ گزر جانے کے باوجود آغا شہید سید ضیاء الدین رضوی کے قتل میں ملوث افراد جن کے خلاف FIR کٹوائی گئی ہے، کو گرفتار نہیں کیا گیا ہے۔ اس کے علاوہ نصاب تعلیم کے مسئلے کو بھی حل نہیں کیا گیا ہے۔ جس کی وجہ سے عوام میں مایوسی پھیلی ہوئی ہے۔

 انہوں نے مزید کہا کہ بعض عناصر جنہوں نے اپنی مخصوص سوچ کو پروان چڑھانے کیلئے ملک عزیز 

پاکستان میں دہشتگردی کا بازار گرم کرتے ہوئے ہزاروں بے گناہ افراد کو خودکش حملوں کے ذریعے دہشتگردی کا نشانہ بنایا، وہی عناصر آج گلگت کے عوام کو دہشتگردی کی آگ میں ڈالنے کی کوشش کر رہے ہیں۔ انہوں نے کہا کہ گلگت بلتستان کے عوام ان سازشوں سے واقف ہیں اور انہیں کسی صورت کامیاب نہیں ہونے دیا جائیگا۔