سب جیو کے پیچھے پڑگئے ہیں، اب اسے اللہ ہی بچائے، سید خورشید شاہ

شیعہ نیوز (سکھر) قومی اسمبلی میں اپوزیشن لیڈر سید خورشید شاہ نے سکھر میں میڈیا سے گفتگو میں کہا ہے کہ جیو کے پیچھے سب پڑ گئے ہیں، اب اسے اللہ ہی بچائے۔ خورشید شاہ نے کہا کہ جیو ٹی وی نے اس سے قبل بھی بڑھ چڑھ کر بہت کچھ دکھایا ہے لیکن اس بار جیو پہلے ہی بیمار تھا، اب اسے مچھروں نے بھی کاٹ لیا ہے۔ یاد رہے کہ جیو ٹی وی کے مارننگ شو میں ایک قوالی کے دوران غیر شائستہ مواد نشر کیا گیا، جس پر ملک بھر میں مختلف سیاسی و مذہبی جماعتوں کی طرف سے احتجاج کیا گیا اور جیو ٹی وی کو بند کرنے کا مطالبہ کیا گیا، جبکہ دوسری جانب جیو نے اللہ اور قوم سے معافی مانگی اور کہا کہ یہ کام نادانستہ طور پر ہوا ہے، جس پر قوم اور اللہ سے معافی کے طلب گار ہیں۔ تاہم مختلف علماء کی طرف سے اس معافی کو قبول نہیں کیا گیا۔