حکومت دہشتگردوں کیخلاف کارروائی کے بجائے تماشہ دیکھنے میں مصروف ہے، شیعہ علماء کونسل

شیعہ نیوز (ڈیرہ اسماعیل خان) شیعہ علماء کونسل خیبر پختونخوا کے صوبائی صدر علامہ محمد رمضان توقیر نے کہا ہے کہ کراچی ائیرپورٹ اور تفتان میں زائرین پر خطرناک حملوں کے بعد بھی معلوم نہیں حکومت کس مصلحت کا شکار ہے، کوئٹہ، تفتان روٹ پہ زائرین پر مسلسل حملوں اور باقاعدہ شناخت کرکے قتل عام ناقابل برداشت ہے، پاکستان کو خانہ جنگی کی طرف دھکیلا جا رہا ہے لیکن حکومت اب بھی دہشت گردوں کے خلاف کاروائی کے بجائے تماشہ دیکھنے میں مصروف ہے۔ ان خیالات کا اظہار انہوں نے ڈیرہ اسماعیل خان میں میڈیا کے نمائندوں سے گفتگو کرتے ہوئے کیا۔ علامہ رمضان توقیر نے کہا کہ ملک میں جنگل کا قانون نظر آتا ہے اور دہشت گردوں کو مکمل آزادی حاصل ہے، حکومت امن و امان کے قیام میں پوری طرح ناکام ہو چکی ہے جبکہ دوسری طرف پاکستان دشمن طاقتیں تیز رفتاری کے ساتھ پاکستان کی تباہی میں مصروف عمل ہیں۔ انہوں نے مزید کہا کہ دہشت گردوں کے پے درپے حملوں کے باوجود حکومتی ایوانوں میں کوئی فرق نہیں پڑ رہا۔ علامہ رمضان توقیر کا کہنا تھا کہ قوم کی امنگوں کی ترجمانی کرتے ہوئے حکومت پاکستان کی بقاء کی خاطر دہشت گردوں کا قلع قمع کرے۔