ڈی آئی خان، یوم القدس انتہائی عقیدت و احترام و جوش جذبے سے منایا گیا
شیعہ نیوز ( پاکستانی شیعہ خبر رساں ادارہ )پورے پاکستان کی طرح ڈیرہ اسماعیل خان میں بھی یوم القدس انتہائی عقیدت احترام اور مذہبی جوش و جذبے سے منایا گیا۔ مختلف تنظیموں کے زیراہتمام مختلف اجتماعات و پروگرام منعقد کئے گئے۔
زرائع کے مطابق مرکزی القدس ریلی امامیہ سٹوڈنٹس آرگنائزیشن کے زیراہتمام جامع مسجد یاعلی (ع) میں سے برآمد ہوئی۔ ریلی میں بچوں، نوجوانوں سمیت بزرگوں نے بھی شرکت کی، ریلی کے شرکاء نے امریکہ، اسرائیل کے خلاف اور آزادی فلسطین کے حق میں نعرے بازی کی۔ ریلی کے اختتام پر امریکہ و اسرائیل کے جھنڈے جلائے گئے۔ مقررین نے پاکستان سمیت دنیا بھر میں جاری دہشت گردی کی شدید مذمت کی اور حکومت سے مطالبہ کیا کہ دہشت گردوں کے خلاف سخت کارروائی کی جائے۔ مقررین نے اپنے خطاب میں یوم القدس کی اہمیت و افادیت پر روشنی ڈالی اور اسلامی دنیا کے حکمرانوں سے مطالبہ کیا کہ وہ آزادی فلسطین کے حق میں آواز بلند کریں۔
یوم القدس کی مناسبت سے شیعہ علماء کونسل کے زیراہتمام جامعۃ النجف میں القدس سیمنار کا اہتمام بھی کیا گیا۔ جس میں مختلف مکاتب فکر سے تعلق رکھنے والے علماء کرام اور اسکالرز نے شرکت کی۔
