پیغمبر اکرمؐ آج ہمارے درمیان ہوتے تو فلسطین کیلئے قیام کرتے، ڈاکٹر صابر ابو مریم
شیعہ نیوز:فلسطین فاؤنڈیشن پاکستان کے مرکزی سیکرٹری جنرل ڈاکٹر صابر ابو مریم نے کہا ہے کہ اگر آج پیغمبر اکرم حضرت محمد مصطفیٰ (ص) آج ہمارے درمیان ہوتے تو فلسطین کیلئے قیام کرتے، ان خیالات کا اظہار انہوں نے یوتھ پارلیمنٹ کراچی کے زیر اہتمام منعقدہ “عشق رسولؐ” کانفرنس سے خطاب کرتے ہوئے کیا۔ کانفرنس سے سابق سینیٹر نہال ہاشمی، معروف عالم دین علامہ شبیر میثمی، معروف ٹی وی اینکر نازیہ علی، معروف سماجی رہنماء ظفر عباس، یوتھ پارلیمنٹ کے رہنماؤں وجاہت پہلوانی، محسن واسطی اور دیگر نے بھی خطاب کیا۔ کانفرنس میں مختلف شعبہ ہائے زندگی سے تعلق رکھنے والے خواتین و حضرات سمیت سماجی تنظیموں کے اہم نمائندے اور سول سوسائٹی کے نمائندوں کے ساتھ طلباء و طالبات کی بڑی تعداد موجود تھی۔ کانفرنس سے خطاب کرتے ہوئے ڈاکٹر صابر ابو مریم نے کہا کہ اللہ تعالی نے ایک لاکھ چوبیس ہزار انبیاء کو بھیجا تاکہ انسانیت کی ہدایت اور رہنمائی کریں، تمام انبیاء علیہم السلام کی سیرت مبارک میں ظالم و جابر قوتوں سے مقابلہ اور مظلوم طبقات کی حمایت کا عنصر مشترک پایا جاتا ہے۔
ڈاکٹر صابر ابو مریم نے کہا کہ مظلوم کی حمایت کرنا دراصل انبیاء کی سیرت کے عین مطابق ہے، آج فلسطین، کشمیر، یمن، شام، لیبیا، عراق و افغانستان سمیت دنیا کے کئی مقامات پر ظالم و جابر صہیونی نظام ظلم و بربریت کر رہا ہے، ہمارا یہ اولین فرض بنتا ہے کہ اپنے پیارے نبی پاک (ص) کی سیرت پر عمل کرتے ہوئے مظلوموں کی حمایت کریں اور ظالموں کے خلاف آواز بلند کریں۔ ڈاکٹر صابر ابو مریم نے کہا کہ ظالم اگر ہمارا بھائی بھی ہو تو ہمیں اس کے خلاف آواز اٹھانا چاہئے اور مظلوم اگر کسی بھی مذہب و رنگ و نسل سے تعلق رکھتا ہو، ہمیں اس کی حمایت میں اٹھنا چاہئے اور یہی حقیقت میں انبیاء علیہم السلام کی سیرت ہے۔ انہوں نے کہا کہ آج اگر پیغمبر اکرم حضرت محمد مصطفی (ص) ہمارے درمیان ہوتے تو فلسطین سمیت دنیا کے تمام مظلوم اقوام کیلئے قیام کرتے اور ظالم قوتوں کے خلاف جدوجہد کرتے۔ اس موقع پر ڈاکٹر صابر ابو مریم نے یوتھ پارلیمنٹ کراچی کے عہدیداروں کو عظیم الشان کانفرنس منعقد کرنے پر خراج تحسین بھی پیش کیا۔
