اسلامی ممالک سرکاری سطح پر یوم القدس منانے کا اعلان کریں

شیعہ نیوز (پاکستانی شیعہ خبر رساں ادارہ) جمعۃ الوداع عالمی یوم القدس کے موقع پر مجلس وحدت مسلمین پاکستان کے زیر اہتمام فلسطین، کشمیر اور یمن کے مظلومین کی حمایت میں کراچی جامع مسجد نور ایمان مرکزی احتجاجی مظاہرے کا انعقاد کیا گیا، جس میں مختلف شعبہ ہائے زندگی سے تعلق رکھنے والے افراد نے سینکڑوں کی تعداد میں شرکت کی۔ مظاہرین نے پلے کارڈز اور بینرز اٹھا رکھے تھے جن پر اسرائیل، امریکہ اور بھارت کے خلاف نعرے درج تھے۔

اس موقع پر اپنے خطاب میں مرکزی ڈپٹی سیکرٹری جنرل علامہ احمد اقبال رضوی نے کہا کہ یوم القدس بیدار، زندہ اور باضمیر لوگوں کا دن ہے، حکیم الامت، بت شکن امام خمینیؒ کے بابصیرت اور دانشمندانہ اعلان کے باعث آج دنیا کے ہر کونے سے صہیونی مظالم کے خلاف آواز بلند ہونا شروع ہوگئی ہے، عالمی یوم القدس کسی مخصوص مکتبہ فکر کا دن نہیں بلکہ آج کے روز دنیا بھر میں شیعہ سنی مسلمان مل کر یوم القدس منا رہے ہیں۔

یہ خبر بھی پڑھیں پاکستانی کسی صورت اسرائیل کو تسلیم نہیں کریں گے، اسرائیل کی نابودی قریب تر ہے

انہوں نے کہا کہ باطل نظام حکومت اور فکر کے خلاف امام عالی مقام حضرت حسین علیہ السلام مزاحمت کا سب سے بڑا استعارہ ہیں، ہم اس امام برحق کے ماننے والے ہیں جنہوں نے فاسق وقت کی بیعت پر شہادت کو ترجیح دی، اسرائیل و امریکہ اس دور کے بدترین فاسق اور اسلام دشمن ہیں، ان کے خلاف میدان میں نکلنا حسینی ہونے کا ثبوت ہے، فلسطین، کشمیر اور یمن میں ظالموں اور غاصبوں کے خلاف مزاحمت کاروں کی ہم مکمل حمایت کرتے ہیں، بلاشبہ حماس اور جہاد اسلامی کا کردار لائق تحسین ہے۔ انہوں نے کہا کہ اسرائیل کی غاصب ریاست کو تسلیم کرنے والے اسلام اور امت مسلمہ کے غدار ہیں، اسرائیل کی کشتی میں سوراخ ہوچکا ہے جو کوئی اس پر سوار ہوگا ڈوبنا اس کا مقدر ہوگا۔

انہوں نے کہا بانی پاکستان قائداعظم محمد علی جناحؒ اور شاعر مشرق علامہ محمد اقبالؒ نے ہمیشہ فلسطین کے عوام کے حقوق کی بات کی ہے، وہ اسرائیل کو ایک غاصب ریاست قرار دیتے تھے، پاکستان کے حکمران بانی پاکستان کی اس فکر پر عمل کرنے کے اصولی و اخلاقی طور پر پابند ہیں، اسلامی ممالک کو یوم القدس سرکاری سطح پر منانے کا اعلان کرکے مظلومین فلسطین سے اپنی مذہبی وابستگی کا اظہار کرنا چاہیئے۔ انہوں نے کہا کہ امریکہ عالم اسلام کا سب سے بڑا دشمن ہے، جو حکمران امریکہ کواپنا خیرخواہ سمجھتے ہیں وہ مغالطے میں ہیں، اپنے مقاصد کے لئے مسلم حکمرانوں کو استعمال کرکے عبرتناک انجام سے دوچار کرنا امریکہ کا پرانا حربہ ہے، مادر وطن کی سالمیت و بقا کے لئے ملک سے امریکی مداخلت کا خاتمہ انتہائی ضروری ہے۔

احتجاجی مظاہرے سے صوبائی سیکرٹری جنرل علامہ باقر عباس زیدی نے اپنے خطاب میں کہا کہ مسجد اقصیٰ سمیت یروشلم میں موجود تمام ادیان کے مقدس مقامات پر صہیونی حملوں کی شدید مذمت کرتے ہیں، مسلم دنیا کے عرب و غیر عرب حکمران اسرائیل کے ساتھ تعلقات منقطع کریں، اسرائیل ایک غاصب جعلی ریاست ہے اور فلسطین صرف فلسطینیوں کا وطن ہے، عرب دنیا کی جانب سے پاکستان پر اسرائیل کے ساتھ تعلقات قائم کرنے کے دباؤ کی شدید مذمت کرتے ہیں، حکومت پاکستان مسئلہ فلسطین پر واضح اور دو ٹوک موقف اختیار کرے، مسئلہ فلسطین کا منصفانہ حل فلسطینیوں کی فلسطین واپسی اور ریفرنڈم ہے، پاکستان میں اسرائیل کی حمایت میں کام کرنے والی این جی اوز اور اداروں کے خلاف کریک ڈاؤن کیا جائے، فلسطین اور کشمیر کے مسائل کو پاکستان کے نصاب تعلیم کا حصہ بنایا جائے۔

احتجاجی مظاہرے میں علامہ صادق جعفری، علامہ حیات عباس، علامہ مبشر حسن، علامہ علی انور، علامہ ملک غلام عباس، ناصر الحسینی، زین رضوی سمیت دیگر موجود تھے۔