وزیراعظم سے جید علمائے کرام کی ملاقات، لاک ڈاؤن پر تعاون کی یقین دہانی
شیعہ نیوز (پاکستانی شیعہ خبر رساں ادارہ) وزیراعظم عمران خان سے جید علمائے کرام کے وفد نے ملاقات کی اور لاک ڈاؤن کے حوالے سے مکمل تعاون کی یقین دہانی کروائی۔
تفصیلات کے مطابق وزیراعظم عمران خان سے جید علمائے کرام کے وفد نے ملاقات کی جس میں مجلس وحدت مسلمین کے سربراہ علامہ ناصر عباس جعفری، حامدالحق حقانی، غلام محمد سیالوی، مولانا طاہر اشرفی، پیر سلطان فیاض الحسن، پیرامین الحسنات شاہ، پیر شمس الامین، پیر نقیب الرحمن، حنیف جالندھری شامل تھے۔ چیئرمین اسلامی نظریاتی کونسل ڈاکٹر قبلہ ایاز، مفتی گلزار نعیمی، چراغ دین شاہ اور مولانا ضیاء اللہ شاہ بھی ملاقات میں شریک ہوئے۔
ملاقات میں وزیرتعلیم شفقت محمود، وزیر مذہبی امور نورالحق قادری، معاون خصوصی فردوس عاشق اعوان بھی موجود رہے جبکہ ویڈیو لنک کے ذریعے گورنر سندھ عمران اسمعیل، مفتی منیب الرحمان، مفتی تقی عثمانی نے بھی شرکت کی۔ علمائے کرام کی جانب سے وزیراعظم کو مکمل تعاون کی یقین دہانی کروائی گئی، علمائے کرام کے وفد کی لاک ڈاؤن کے حوالے سے وزیراعظم کے موقف کی بھرپورتائید کرتے ہوئے کہا کہ لاک ڈاؤن کے حوالے سے وزیراعظم کا موقف حقیقت پسندانہ اور زمینی حقائق پر مبنی ہے۔
