شہدا کی قربانیوں کی بدولت آج ہم آزاد فضا میں سانس لے رہے ہیں، سربراہ پاک فضائیہ

شیعہ نیوز ( پاکستانی شیعہ خبر رساں ادارہ) پاک فضائیہ کے سربراہ ایئر چیف مارشل سہیل امان نے کہا ہے کہ ملک کی خاطر کسی بھی قربانی سے دریغ نہیں کریں گے، شہدا کی قربانیوں کی بدولت آج ہم آزاد فضا میں سانس لے رہے ہیں،1965ء کے جانبازوں کو قوم سلام پیش کرتی ہے۔

زرائع کے مطابق 6 ستمبر یوم دفاع کی مناسبت سے پی اے ایف میوزیم کراچی میں تقریب کا انعقاد کیا گیا، جس میں پاک فضائیہ کے سربراہ ایئر چیف مارشل سہیل امان نے شرکت کی، جبکہ راشد منہاس شہید کی والدہ نے خصوصی طور پر شرکت کی اور یادگار شہدا کا افتتاح کیا۔ اس موقع پر شرکاء سے خطاب کرتے ہوئے ایئر چیف مارشل کا کہنا تھا کہ 1965ء کے جانبازوں کو قوم سلام پیش کرتی ہے، پاک فضائیہ پیشہ وارانہ مہارت اور بہادری کی شاندار تاریخ رکھتی ہے، شہدا نے ملک کی خاطر کسی قربانی سے دریغ نہیں کیا، یادگار شہدا صرف عمارت نہیں بلکہ پاک فضائیہ کی وطن سے محبت کی علامت ہے، شہدا کے اہل خانہ کی تقریب میں موجودگی کو قابل فخر سمجھتے ہیں۔

ایئرچیف مارشل سہیل امان کا مزید کہنا تھا کہ پاک وطن کے لئے شہدا کی قربانیوں کو ہمیشہ یاد رکھا جائے گا، شہدا کی قربانیوں کی بدولت آج ہم آزاد فضا میں سانس لے رہے ہیں۔ اس موقع پر پاکستان ایئر فورس کے دستے نے پریڈ بھی کی۔