اقوام متحدہ اسکول پر اسرائیلی بمباری، 200 فلسطینی شہید و زخمی

شیعہ نیوز: غاصب صیہونی فوج کے جبالیا کیمپ میں اقوام متحدہ کے اسکول پر فضائی حملے سے 200 فلسطینی شہید و زخمی ہوگئے۔ عرب میڈیا کا کہنا ہے کہ اقوام متحدہ کے اسکول میں ہزاروں بے گھر فلسطنیوں نے پناہ لی ہوئی ہے۔ اسرائیلی فوج کے غزہ میں حملے جاری ہیں، تازہ فضائی حملہ جبالیا کیمپ میں اقوام متحدہ کے اسکول پر کیا گیا۔ قطر کی جانب سے جبالیا کیمپ میں اقوام متحدہ کے اسکول پر بمباری کی مذمت کی گئی ہے۔ قطری وزارت خارجہ کا کہنا ہے کہ اسکولوں، اسپتالوں پر اسرائیلی حملوں کی فوری عالمی تحقیقات ہونی چاہیئے۔ دوسری جانب اسرائیلی فوج کی جانب سے وسطی غزہ کے پناہ گزین کیمپ میں ایک گھر پر بھی بمباری کی گئی، جس میں 4 افراد شہید ہوگئے۔

خان یونس میں عمارت پر اسرائیلی حملے میں بچوں سمیت 26 فلسطینی شہید ہوگئے، اسرائیلی بمباری اور حملوں میں شہداء کی مجموعی تعداد 12 ہزار سے زیاہ ہوگئی ہے۔ اسرائیل نے جنوبی علاقے سمیت پورے غزہ میں حماس کو نشانہ بنانے کا اعلان کرتے ہوئے کہا کہ جنوب میں حماس کے ٹھکانوں کو نشانہ بنانے کیلئے درست وقت کا انتظار ہے۔ اسرائیل نے مغربی کنارے پر بھی حملوں میں اضافہ کر دیا، نابلس میں عمارت پر حملے میں 5 افراد شہید اور دو زخمی ہوگئے۔