پاکستان کی حفاظت ہم سب پر واجب ہے، علامہ حافظ ریاض نجفی
شیعہ نیوز (پاکستانی شیعہ خبر رساں ادارہ) وفاق المدارس الشیعہ پاکستان کے صدر آیت اللہ حافظ سید ریاض حسین نجفی نے کہا ہے کہ پاکستان اللہ کی لازوال نعمت، عطیہ اور بہت بڑا ہدیہ ہے۔ وطن عزیز کی وجہ سے ہمیں آزادی اور ترقی ملی، آزادی کی نعمت نہ ہوتی تو ہم انگریز اور ہندووں کے غلام ہوتے۔
علامہ حافظ ریاض حسین نجفی نے کہا کہ 1947ء میں آزادی سے پہلے مسلمانوں کے پاس کچھ نہیں تھا۔ کچھ مسلمان ہندووں کا سود چکاتے چکاتے ان کے غلام بن جاتے تھے اور بعض اوقات تو ساری کی ساری بستی اسی سود کی وجہ سے ان کی غلام بن جاتی تھی۔ آج پاکستان کی بدولت ہمارے پاس سب کچھ موجود ہے۔ لاہور کے انار کلی بازار میں صرف چار پانچ دکانیں مسلمانوں کی اور باقی سب ہندووں کی تھیں۔ 27 رمضان کو اسلام کے نام پر وجود میں آنیوالے پاکستان کی حفاظت ہم سب پر واجب ہے۔
یہ خبر بھی پڑھیں بھارتی فنڈڈ جیو جنگ گروپ ایک مرتبہ پھر شیعہ مخالف زہر اگلنے لگا
علی مسجد جامعۃ المنتظرمیں خطاب کرتے ہوئے انہوں نے کہا جہاں اسلام کے پیروکار باقی مکاتب فکر کا حال تھا اسی طرح مکتب اہل بیت اہل تشیع کی علمی اور عملی حالت کوئی اچھی نہ تھی۔ قوم شیعہ کے پاس 1960ء کی دہائی میں صرف چند مسجدیں تھیں کہ جن میں نماز باجماعت تقریبا ًنہیں ہوتی تھی۔ لوگوں کو اپنی میتیں صحیح طور پر دفن کرنے کی رہنمائی بھی نہیں تھی۔ جب ان کو علماء شرعی مسئلہ بتاتے تو کہتے تھے ہم نے تو اس سے پہلے ایسا نہیں سنا۔ لیکن آج پاکستان میں علماء کرام کی محنتوں کی بدولت شیعہ مدارس کا جال پھیلایا جا چکا ہے، یہ ہماری ملی قوت اور عظمت ہے، ہر طرف علما ءاور طلباء نظر آتے ہیں۔ یہ سب کچھ پاکستان کے وجود سے ہے۔ اللہ تعالیٰ پاکستان کو سلامت اور آباد رکھے۔
