شب شہادت امام محمد تقی علیہ السلام
شیعہ نیوز (پاکستانی شیعہ خبر رساں ادارہ) فرزند رسول حضرت امام محمد تقی علیہ السلام کی شب شہادت کی مناسبت سے پاکستان سمیت دنیا کے مختلف ملکوں میں مجالس عزا منعقد کی جارہی ہیں۔
جواد الائمہ حضرت امام محمد تقی علیہ السلام کی شب شہادت کی مناسبت سےپاکستان سمیت دنیا بھر میں مجالس عزا کا سلسلہ جاری ہےجبکہ عراق اور خاص طور پر عراق کے مقدس شہر کاظمین میں جہاں امام محمد تقی علیہ السلام کا روضہ اقدس واقع ہے لاکھوں زائرین عزاداری کر رہے ہیں اور ان کی غم انگیز شہادت پر آنسو بہا رہے ہیں۔ ایران کے شہر مشہد مقدس میں آپ کے والد بزرگوار حضرت امام رضا علیہ السلام کے حرم مطہر اور قم المقدسہ میں آپ کی عمہ گرامی حضرت فاطمہ معصومہ سلام اللہ علیہا کے حرم مطہر میں بھی مجالس عزا جاری ہیں جہاں ہزاروں سوگوار و زائرین نوحہ و ماتم میں مصروف ہیں اور اس المناک شہادت پر ان عظیم ہستیوں کو پرسہ پیش کر رہے ہیں۔
فرزند رسول حضرت امام محمد تقی علیہ السلام کو سن دو سو بیس ہجری قمری میں ذی القعدہ کی آخری تاریخ کو ظالم حاکم معتصم نے زہر دے کر شہید کر دیا تھا اور امامت کی سنگین ذمہ داری آپ کے فرزند حضرت امام علی نقی علیہ السلام کے کاندھوں پر آن پڑی۔
حضرت امام محمد تقی علیہ السّلام کو کمسنی ہی میں مصائب اور آلام کا سامنا کرنا پڑا اور باپ کی محبت و شفقت سے محروم ہو گئے تھے ۔
آپ کی عمرمبارک صرف پانچ برس تھی جب حضرت امام رضا علیہ السّلام مدینہ سے خراسان کی طرف سفر کرنے پرمجبور ہوئے تو پھر زندگی میں ملاقات کا موقع نہ ملا امام محمد تقی علیہ السّلام سے جدا ہونے کے تیسرے سال امام رضا علیہ السّلام کی شہادت ہو ئی۔
