صدر مملکت عارف علوی، وزیراعظم عمران خان کا یوم عاشور پر پیغام

شیعہ نیوز (پاکستانی شیعہ خبر رساں ادارہ)  صدر ڈاکٹر عارف علوی نے کہا ہے کہ شہادت امام حسین رضی اللہ تعالی عنہُ حق کی فتح اور ایثار و قربانی کا استعارہ ہے، وزیراعظم عمران خان نے بھی اپنے پیغام میں نواسہ رسول اور ان کے ساتھیوں کی عظیم قربانیوں کو خراج تحسین عقیدت پیش کیا ہے۔

وزیر اعظم عمران خان نے یوم عاشور کے موقع پر اپنے پیغام میں کہا کہ آج حرمت والے مہینے محرم الحرام کی 10 تاریخ ہے اور پوری دنیا میں مسلمان آج نواسہ رسول اور ان کے ساتھیوں کی عظیم قربانیوں کو خراج تحسین عقیدت پیش کر رہے ہیں۔وزیر اعظم نے کہا کہ جذبہ شبیریؓ مسلمانوں کے ایمان و یقین، سچائی اور اصول پسندی کی روایت کو جلا بخشتا ہے۔یہ اسلام کے ابدی پیغام اور جذبہ قربانی کی لازوال روایت کی آبیاری کا سرچشمہ ہے۔ وزیر اعظم نے کہا کہ ہمیں کشمیر میں بھارتی سامراج سے برسرپیکار عوام کی قربانیوں کو بھی خراجِ تحسین پیش کرنا چاہیے، مقبوضہ کشمیر کے عوام نے حق پر قائم رہتے ہوئے سنتِ امام حسینؓ کو زندہ رکھا ہے عمران خان نے کہا کہ گزشتہ کچھ عرصہ سے کورونا نے پوری دنیا کو اپنی لپیٹ میں لے رکھا ہے، اللہ کی مدد، حکومت کے بروقت اقدامات سے کورونا کے پھیلاؤ پر کافی حد تک قابو پا لیا۔

صدر مملکت عارف علوی نے اپنے پیغام میں کہا کہ محرم وہ جذبہ عطا کرتا ہے جس کی بدولت ہم بڑی سے بڑی آزمائش کا مقابلہ کر سکتے ہیں۔ صدر پاکستان ڈاکٹر عارف علوی نے کہا کہ ہمیں چاہیے کہ باہمی نفاق اور فرقہ واریت کو بالائے طاق رکھ کر ملکی ترقی کے لیے کام کریں۔ اپنے پیغام میں صدر عارف علوی کا کہنا تھا کہ قوم نے مثالی نظم و ضبط کا مظاہرہ کرتے ہوئے کورونا جیسی عالمی وبا پر قابو پایا، کورونا کا خطرہ ابھی ٹلا نہیں ہے، امید ہے پوری قوم یومِ عاشور پر حفاظتی تدابیر پر عمل درآمد کو یقینی بنائے گی