فلسطین سرخرو ہے اور اسرائیل ہزیمت کا شکار ہے اور جلد شکست سے دو چار ہوگا، سراج الحق

شیعہ نیوز: صدر رائس ملز ایسوسی ایشن ضلع قصور ملک محسن نذیر نے فلسطینیوں کی امداد کے لیے پچاس لاکھ کا چیک امیر جماعت اسلامی کو پیش کیا۔ وفد کی قیادت صدر رائس ملز ایسوسی ایشن ملک محسن نذیر نے کی۔ وفد میں حاجی محمد رمضان، میاں لیاقت، میاں اشفاق، محمد شبیر، آحد جمال، اسد جمال ایڈووکیٹ اور چوہدری منیر شامل تھے۔ ملاقات ایک گھنٹہ جاری رہی اس موقع پر سیکرٹری اطلاعات جماعت اسلامی پاکستان قیصر شریف بھی موجود تھے۔

امیر جماعت اسلامی سراج الحق نے کہا کہ اہلیان پاکستان نے ہمیشہ اپنے فلسطینی بہن بھائیوں کے لیے دل کھول کر مدد کی ہے۔ 24 کروڑ پاکستانیوں کے دل اہل فلسطین کے ساتھ دھڑکتے ہیں۔ پاکستان کی عوام نے بھرپور انداز سے فلسطین کے حق میں نہ صرف آواز بلند کی بلکہ ہر فورم پر اسرائیل کے مظالم کی مذمت کی اور مالی طو رپر بھی تعاون کیا مگر بدقسمتی سے ہمارے حکمران عوام کے جذبات کی ترجمانی نہیں کرسکے۔ تینوں حکمران سیاسی جماعتیں امریکہ اور استعماری قوتوں کے خوف اور ناراضگی کے ڈر سے عالمی فورمز پر کوئی جاندار موقف اور احتجاج کرنے میں ناکام رہی ہے۔

آزمائش کی اس گھڑی میں فلسطینیوں کے حوصلے بلند ہیں اور آئندہ کے لیے پرعزم بھی۔ فلسطین سرخرو ہے اور اسرائیل ہزیمت کا شکار ہے اور جلد شکست سے دو چار ہوگا۔ اس موقع پر صدر رائس ملز ایسوسی ایشن قصور ملک محسن نذیر نے جماعت اسلامی اور الخدمت فانڈیشن کی کوششوں کو سراہا اور کہا کہ  دنیا بھر میں کوئی آفت آتی ہے تو جماعت اسلامی اور الخدمت کے لوگ بڑے پیمانے پر امدادی سرگرمیاں کرتے ہیں۔